精明消費：運動服展銷三折起
人日齊去新城市掃貨
蘋果日報 2004/01/28 08:00
黑紅顏色兩間設計，夠sharp夠搶眼，鞋跟特別設計針對扁平足人士需要。橡筋鞋頭易於穿上，同時用魔術貼緊貼腳跟位置，鞋側位大大隻「N」字，識貨之人一看就知係NB，款式唔老土。
想着衫着得好睇，揀番件衞衣就最易襯，寬身空間最適合唔鍾意show身材的女士，Timberland字樣刻在心口，衫腳有橡筋位防止扯鬆。
打波前梗係要做熱身運動warm-up喇，一向甚少出產外套的NB系列一樣可大派用場，寶藍色長袖毛冷質料可保暖，拉鏈設計，就算唔係做運動都可以着出街襯。
快踏入二月，又係春回大地的季節；各位女士們又要開始換季買番啲短袖衫，粉紅T-shirt配淺藍色褲夠搶眼之餘，配搭又襯到絕，Fila抓毛褲內有冷毛設計，暖入心窩，陣陣涼風吹埋唔會凍僵，兩件加埋唔使兩嚿水，抵買之選。
做完運動梗係唔可以俾涼風入侵，有件Fila大褸就「無有怕」，全藍色純棉質料夠晒暖，拉鏈設計可以保護頸部位置，最啱着埋去戶外打波。
墨綠色adidas輕便型背囊，不論踢波或行山都啱用，大小兩袋拉鏈裝備裝乜都得，袋內有暗格裝置，而袋側有鈎位可掛鎖匙、指南針等，用途多多經濟又實用。
半價開倉Timberland長袖Polo衫絕不老土，連領口全灰色設計平民大方，衫袖有透氣孔位，打波唔會焗到成身汗。
雖然話係Golf專用衫，紅間條Fila短袖Polo恤一樣可以出席各大小體育活動，米白顏色夠高尚，藍色反領口設計襯白色，一絕。
打籃球唔鍾意着得「懶」專業，全身都係NBA套裝的話，自由配搭adidas黑色外套加四個骨運動褲亦配襯得宜，外套袖邊及領口內側有螢光黃間條設計，夠sharp顏色唔死板，adidas中size運動褲亦可當fashion，插袋超型！Head白色跑鞋唔使綁繩，方便易着，鞋側有雙間藍線條，鞋身有特別透氣孔設計，跑步時更舒服。
一身輕便Polo恤夠醒神，Timberland藍色短袖衫不落俗套，襯埋個Fila紅色斜孭袋，孭帶長短可隨意調校，打波做運動最適合盛載運動衣物或私人物品。
買Timberland唔一定得帆船鞋，爬山Boot的質素都有番咁上下，黑色鞋身兼用上橡膠作鞋底，減少回震，狗牙鞋底，行山遠足時雙腳更加貼地，防止拗柴，七孔穿繩設計四平八穩，絕對係爬山人士的恩物。
唔少潮流版同事都話NB系列的「574」最襟着同埋最舒服貼腳，備有防震功能，黃色綁繩設計夠classic，鞋側兩邊都有個大N字，硬膠鞋底即使行石屎地都唔會磨爛，跑步晨運亦可。
地址：沙田新城市廣場一期8樓801?05號店舖
電話：26849175
日期：即日至2月4日