基本法委員會主任李飛爺爺來港頒佈「聖旨」，唔少建制派權貴、問責官員、高級公務員晨咁早就要去到會展，現場聽李飛噴口水，佢哋同學生命運一樣，就係要一齊睇live，部分人純粹嚟「點名」，話畀阿爺知「我嚟咗」，內心有幾願意出席，大家心照不宣，場內人士唔知又有幾多人響應林鄭嘅「提醒」，「瞇埋隻眼」呢？

不過用腳表態先至最真誠，八方企喺門口睇吓有邊個遲到早退，以示尊重呢個場合，點知見到商務及經濟發展局副局長陳百里不單遲到，仲要早退，李飛仲未講完，陳百里已經喺不足半小時離場，唔通有公務在身？另一位就係建制派立法會議員馬逢國，又係未夠半小時就走人，唔通要趕返去立法會開會？諗諗下，李飛演講，台下貴賓遲到早退又得、瞇埋隻眼又得，學生綁條紅布唔睇live，真係好濕濕碎。