韓國女星崔智友呢期傳緋聞，經常同綜藝節目《一日三餐》男星李瑞鎮嘅名字扯埋一齊，不過嚟緊應該會多啲有關佢拍新劇《第二個二十歲》嘅報道，因為套劇下個月就會播出街，近日一班演員仲圍埋一齊對劇本，增進感情。

電視台今日公開咗對劇本時嘅相，女主角崔智友、飾演佢初戀男友嘅李尚允，以及演友姐老公嘅崔元英，個個都好認真，之後三位主角仲握拳合照，明顯對新劇收視充滿信心。

而友姐前日就被影到同李尚允現身校園拍戲，兩個神色好似幾凝重，唔知呢場戲講乜嘅呢？