【子健蘋馬】上仗郭能發揮有瑕疵 「紅磚勇士」換人再搏
蘋果日報 2020/03/13 23:10
子健子健蘋馬紅磚勇士
紅磚勇士上仗郭能發揮平平，因而屈居第四。
周末（14日）第一場五班草地千二米，「紅磚勇士」前仗、上仗雖只跑三、四名，然而結合對手、郭能發揮等因素，其實唔差得幾多。
前仗頭二馬「東龍陣」及「怡昌飛駒」，再出不勝有位。上仗增程千四，難度有加無減，拍住二、三名「星河戰駒」及「生生勝勝」同到，計埋第五的「笑傲成功」，再出亦不勝有位。
點解強調要加埋郭能發揮因素，只要有睇過，應會如我一樣，覺得直路騎得唔夠好。重鞭、常分韁，無法令「紅磚勇士」唔閃出閃入，應可更好。
呢場打叠用力搏輸兩場，賀賢安排小休重來，一唞就近個半月，操到埋門再試泥閘，鍾意佢過終點仍有餘勢表現。
「紅磚勇士」不單無走樣，還覺比前更硬淨；早決定飛起郭能，曾搵莫雷拉操過，最後無騎，換何澤堯一樣好，無咁熱仲抵博！