指女友分手純屬空虛
郭政鴻諗計掂滕麗名
滕麗名日前在博客中自爆感情世界重回一片空白,頓惹來她與緋聞男友郭政鴻分手傳聞,雖然滕麗名口口聲聲指博客中所指的「他」並非鴻仔,但據悉滕麗名與鴻仔只是耍花槍,女方一氣之下才自爆分手。
昨日鴻仔與郭晉安、關詠荷及米雪等在將軍澳電視城為《五味人生》開鏡拜神,問到滕麗名自爆分手一事時,鴻仔笑笑口說:「佢係咪講以前嘅歷史呀?個個就以為係我,其實係個誤會,冇分手,好朋友、好同事點會分手。」
滕麗名近日是否不開心?鴻仔代緋聞女友詳細報告說:「因為佢拍完《掌上明珠》,某程度上係佢拍完覺得好失落好空虛,之前佢拍得太開心太投入喇。」對於滕麗名的情緒問題,鴻仔表示有責任要幫助滕麗名處理,他說:「佢話點就點,佢話要食飯就食飯,搵班朋友飲酒就飲酒,佢咁人見人愛,實會諗辦法佢開心。」
關詠荷表示再拍劇集,感到好辛苦,在拍劇期間因為在家中彎腰洗頭扭傷肌肉,她說:「唔係好嚴重,我都有睇醫生,仲要戴腰封,再加上呢套喜劇動作大,都好吃力。」至於郭晉安相隔9年再於《五味人生》跟關詠荷合作,雙方都已成家立室及為人父母,安仔說:「無論演技同人生經驗,大家都唔同咗。」
採訪:楊潔雯
攝影:葉君海