【堅持唔關感情事】分手陳家樂繼續瘦削 做店長硬Chok冧樣
小三拜金陳家樂余香凝瘦削
「爺爺」陳家樂與余香凝被爆分手一個禮拜多,依然係新聞人物,女方情史越揭越多,之前有傳佢唔係第一次一腳踏兩船,讀書年代已有一個做藥業老闆男友陳秋山(Jason),仲每個月男友畀零用,之後佢再識陳家樂,背負第三者嫌疑,Jason喺15年喺facebook貼舊文感歎:「性格決定命運,道德觀念這麼低,只配嫁窮郎。」(新聞連結: https://bit.ly/2MCwfTq ),而陳家樂喺Ig護航,更表示對方係「最親的親人」。(新聞連結: https://bit.ly/2JYwtqf )
分手後,「爺爺」工作唔少,今日又去咗銅記開工,擔任時裝品牌店長,失戀滿愁容嘅佢好似心情平伏唔少,見佢拎住鮮花,大擺冧爆表情,佢就話平時好少出冧樣,通常做錯事出嚟o氹屋企人:「媽咪成日畀我嗲,細個時候,嗲完唔會鬧同打,細個時我好似女仔識o氹人,老師都叫我『囝囝』。佢就直認有異性緣:「可能啲女仔覺得我冇攻擊性,o依家大個咗,都鍾意玩男仔嘢,好似踢波咁。」被問到有無畀女仔追過,佢就話中學時代有女同學追:「好開心,有女仔對你咁好,唔係佢完全主動,大家都對大家有意思。」
講到心情回復未,佢就話一路都好平伏,直言係瘦咗:「不過唔係因為感情事,因為工作多,拍戲宣傳,瞓得比較少,應該要增肥,嚟緊有角色做警察,唔可以太『削』,要鍛煉番肌肉。」再問到情緒如何,佢就話一路都唔係好有嘢:「不過好多人關注有壓力,大家誤會咗,睇到嘅事唔係咁,同埋只係當下壓力。」
精選娛聞,喺晒《娛果》
http://fb.com/appledailyent