足球教練出身的黃興桂成名在他講波時的金句，更被網民封為「桂神」，他的爛gag今日卒之遇到對手，就是何輝跟江忠德這對雙劍合璧，單是「阿馬遜河咪喺阿馬遜囉」已技驚四座。

何輝客串講幾場波

其實「江、何」配始於98年兩人在ESPN同台講波，當年他們已擦出不少火花。今次他們再發揮雙人的威力，在桂神面前廢噏功力毫不遜色。

面對這對後起之秀，桂神亦有新花樣，好像「亞馬遜河除咗有奇珍、異獸，又有海味」就是表表者。事實上江、何配亦隨着何輝回歸廣東電視台體育頻道後，暫成絕唱。早前有不少本港球迷以為他被炒，引來不少網友關注，事實他只是在港客串講幾場波。
桂神昨日接受電話訪時表示講波時金句都是即興，亦喜歡講解地方風情。他說：「睇波人人識睇，講風土人情係我嘅style，係好美式嘅評述方式。」至於將「wonderful」改成「twoderful」是63年時到夜總會聽英文棟篤笑時學的。
江忠德昨日電話訪問時笑言跟何輝的默契應該自當年ESPN開始，他說：「好多對話都係即興，想喺冷場時搞吓氣氛。」
此外，昨日出爐的收視表顯示，揭幕戰巴西對克羅地亞平均收視有7點（約46萬人收看），最高一場為哥倫比亞對希臘，有9.6點（約61.4萬人收看），最少為烏拉圭對哥斯達黎加的2.7點（約17.3萬人收看）。
採訪：李森

【金句王】何輝x江忠德玩嘢對答

何輝：何　江忠德：江

巴西世盃

江：想畀個like佢。
何：咁需唔需要送TV Buddy呀？
江：要有300個like先換到獎品。

江：點解要換走巴洛迪利？
何：因為呢度係亞馬遜流域吖嘛！
江：咁同佢有咩關係呢？
何：熱囉。
江：熱唔到火出嚟呀！

何：意大利踢法一般比較慢熱。
江：咁今晚慢唔慢呢？
何：今場唔慢。
江：咁熱唔熱呢？

精選語錄

江：嘩！如來神掌呀！
何：如來神掌第幾式呀？
江：雙龍雙掌嘩。
何：如來神掌有雙龍雙掌？

碧咸第一次着上印有佢囝囝個名嘅Boot比賽，當俾對方球員踩甩一隻鞋時……
何：如果對鞋改印上佢老婆個名，會唔會緊啲呢？係綁得緊啲呀。
江：啊！碧咸頂白色帽又幾靚噃！
何：可能襯番對白Boot呢！
江：嘩！好彩佢對Boot唔係綠色。
江忠德望一望何輝對鞋……
江：你對鞋都幾靚！又黃又綠，好彩你唔係做醫生。

黃興桂金句

巴西世盃

1.唔止wonderful，係「twoderful」呀！
2.今場波科特迪瓦都幾有運呀，不過係衰運。
3.亞馬遜河除咗有奇珍、異獸，又有海味。
4.呢球一係入，除非唔入！
5.因為落雨，啲雨托高咗個波喎！

精選語錄

1.喺今場波邊隊能夠入一「粒」先，嗰隊就會有優勢。
2.十二碼呢樣嘢呢，一係入，一係就唔入。
3.呢球波，如果冇龍門就入。
4.呢球波keeper（守門員）有反應。
5.愛華頓呢隊波蔗渣嘅價錢，但係踢出燒鵝嘅味道。
6.呢位球員有三大缺點，冇速度、唔夠快、跑得慢。
7.足球係要將個波射入網。
8.梅度梅度，梅開二度~~保方保方，保住後方。
9.波唔使講㗎，球迷自己識睇。

【622公投　我撐普選】 毅行直播
流動版網頁︰ http://622popvote.appledaily.com