【名家搶先睇】餓狼搶錢定避險(晉佳)
美股晉佳
美股之所以跑贏環球股市,其中一個原因係佢發動貿易戰之時,其他國家仍以過去幾十年嘅和平思維去同今日嘅美國相處,於是美國出拳傷及中國,中港股走弱,而中國出拳只係隔靴搔癢,比較之下,美股自然吸引資金流入。
美股一個可能嘅轉捩點,就係喺中國冇得大美國2,000億美金進口貨品關稅之下,會唔會使出真正到肉嘅招數。執筆時仍未有確實消息,市傳中國限制出口零件去美國,如果玩到瑞聲(2018)等等完全冇得幫iPhone生產零件,呢類七傷拳反而中國仲傷過美國,一日未認真郁到重點科技層面,便未形成美股大插嘅理由,中美大戰維持「貿易戰」層面,科技股就會繼續成為主題股份。今日港股基建、水泥、鋼鐵股炒上,但往績告訴大家,呢類升親多數只一兩棍。
喺中美打緊貿易戰之際,日股能夠向上突破,日經平均指數成分股幾乎全面上升,證明撇開貿易戰因素,環球市底未算太差。始終隔咗大半年冇乜炒作氣氛,近7月一味流入亞馬遜、蘋果,基金元氣未至於傷到冇力報仇,問題等超賣進而風險胃納回升,等到幾時。雖然整體港股未必有力轉強,但途中炒風可能意想不到。映客(3700)都炒一餐,就知大家幾咁餓波。
https://www.facebook.com/advanceguy1