中港股市埋單齊齊倒升，但予人拉牛上樹之感，滬深兩市成交唔夠七千億人仔，香港呢邊亦只得八百幾億，全日靠隻騰訊（700）頂住。仔細看，電能（006）、長建（1038）、置富（778）、泓富（808）全部創新高。唔好心多，唔係講緊李氏力場，而係資金湧晒去公用同房託股，避險情緒高漲，小心睇路。
半新股繼續開派對，炒股忌拗頸，今日再推介半新股BBI生命科學（1035），賣點與楓葉教育（1317）相似。

冇蟹貨可塑性高

公司從事開發、製造及銷售生命科學研究產品及服務，上至動物植物研究、食品行業，下至疾病研究、醫學診斷，業務夠獨特之餘，應用範圍卻廣泛，行業門檻極高。根據專業數據，二○一三年中國DNA合成產品供應商中，其收益排名第一，市佔率達17.4%，主要客戶包括高等院校、大學及科研院所，實力毋庸置疑。
IPO分配方面，BBI生命科學超購近五十倍，一手中籤率達六成，派到一街都係，同噚日推介嘅楓葉教育如出一轍，但BBI生命科學走勢更靚，上市後以圓底走勢收貨，近日已經重上招股價，蟹貨阻力都冇埋。公司最新市值十億唔夠，街貨兩億多啲啲，以近期半新股成交億億聲計，一旦有資金追捧，好難唔飛上天！

唐牛
https://www.facebook.com/tongcow88