喺無綫新劇《點解阿Sir係阿Sir》中扮學生妹嘅22歲o靚模蔡嘉寶（Akina），劇中連一句對白都冇，出場又快到肉眼幾乎睇唔到，但呢位快閃學生妹挾早前同組合CAllStar拍嘅「狂躁港女當街要男友擲電話」假片嘅出位演繹餘勢，竟然令佢喺《點》劇中神奇跑出。
Akina對於被網民追捧好意外，佢噚日話自己只係演劇中群戲，總共拍咗19日，佢話：「我喺第一、二集啲窿窿罅罅出場，第一集做保齡球啦啦隊，冇對白。你唔講我唔知（被網民留意），唔敢上網睇，如果人哋講唔好，費事自討苦吃。」Akina仲直認係大茄：「基本上係，好聽啲咪特約演員。」佢又拍過電影，就係喺《第一戒》扮鬼上身後自殺嘅角色。

懶理被指Chok聲

問Akina自覺有乜優點引起網友注意？佢笑住話：「經常更新facebook啩？」有人形容佢係chok聲港女，佢就懶理：「似貶意，算啦，都過咗去，細個時已經有人話我把聲扮可愛。」
Akina三圍32C、24、33，雖有身材但暫未部署出寫真，佢又話唔會着泳衣：「健康嘅性感OK啦，人哋有條件騷，我冇條件，香港一個周秀娜夠啦。」但陳靜同楊梓瑤以露上位，Akina話：「呢啲交畀佢哋，我冇本事做。」
原來係Akina嘅模特兒男友下咗暴露免問嘅禁令，Akina話：「唔想佢唔開心，因為咁而少咗job唔緊要，男朋友緊要啲。」Akina以前扁口扁鼻，同家正妹樣有分別，佢解釋：「以前肥豬啲，話我整容咪盞睇得起我，開頭我以為係講緊學生時代中間分界戴眼鏡嘅舊相，勁娘，我係瘦咗啫。」