由韓劇《三流之路》男星朴敘俊跟女星朴敏英合作嘅tvN新劇《金秘書為何那樣》前日開播收視成績相當唔錯，首集劇情就進展神速，飾演霸氣富二代嘅朴敘俊喺第一集就同朴敏英求婚，首集收視即錄得5.757%，成績相當唔錯。

噚晚播出第二集，朴敍俊因為跟咗佢九年嘅「金秘書」朴敏英話要辭職，搞到朴敍俊摸不著頭腦點解佢要辭職，得知朴敏英想結婚時，朴敍俊喺前晚第一集已向朴敏英求婚，不過朴敏英就以為佢飲醉酒，當佢所言係醉話。而朴敏英因為呢九年嘅秘書生活令佢冇晒時間，所以佢堅決要辭職，仲由一向聽話嘅秘書變成愛頂撞上司嘅秘書。

朴敍俊為咗挽回朴敏英，於是就出席職員嘅小聚會，又殷勤照顧朴敏英，令朴敏英嚇得噎到，但朴敍俊就會錯意，以為自己魅力令到朴敏英覺得怕醜，點知朴敏英就大潑冷水，指朴敍俊唔係佢鍾意個類型，搞到朴敍俊呢位完美主義者大為崩潰，反問原因，朴敏英於是就一口氣指朴敍俊太自戀，搞到佢好攰，更一點私人時間都冇晒。

朴敍俊扮晒嘢話會放朴敏英走，但另一方面就施計令自己得知朴敏英想要嘅理想型，得知佢鍾意佢喺樂園約會時，就豪氣包下整個樂園同朴敏英約會，並得戚話：「金秘書，你等咗好耐了嗎？」而下周三播出嘅第三集，朴敍俊仲跟蹤朴敏英去相睇，唔知朴敍俊會唔會搞破壞呢？

另外，噚晚一集嘅《金秘書》比第一集收視跌咗少少，第二集收視有5.403%。

更多韓流，喺晒《娛果》
http://fb.com/appledailyent