何超儀日前獲邀往新加坡出席國際講座（新聞連結： https://bit.ly/2NyaVCH ），題目係探討人類嘅精神面貌發展，聽落好似好嚴肅，不過超儀就相當破格，除咗梳咗一個大衛寶兒（David Bowie）嘅Ziggy Stardust頭外，更喺一班老外面前大講本土廁所文化，令一眾與會者唔知好嬲定好笑。

超儀話一直都希望能爭取到喺片場內，女性有獨立廁所，唔使男女同用一廁，提供一個乾淨嘅獨立廁所，係對女性嘅尊重。演講時佢又大講快樂正能量，更分享咗年初喺冰島拍紀錄片嘅經驗，期間提到冰島有冰火之國嘅稱號時，佢講笑話「冰火」喺香港係口技嘅一種，可惜在座嘅係日本人佔多，靠即時傳譯似乎都聽唔明佢講乜。之後超儀又講凡事唔好太執著，佢刻意模仿電影《蝙蝠俠》內小丑嘅語氣：「Why so serious?」這次個個聽得明，識得笑。

唔好以為出席呢類國際論壇，超儀態度輕鬆，其實佢係十分緊張自己嘅表現，當日佢早到咗，竟走到場館對面商場嘅一間Hello Kitty餐廳，唔係為咗空肚食早餐，而係把握時間修改講稿，對住Hello Kitty寫演講稿。

精選娛聞，喺晒《娛果》
http://fb.com/appledailyent