16年前，黎瑞恩（小恩子）開完處女紅館騷後嫁金利來太子曾智明，做豪門少奶奶；16年後，變咗單親媽媽嘅小恩子再踏紅館，將於下月5及6日舉行「感恩有你」演唱會，渴望生死戀嘅小恩子，偏偏遭遇咗婚姻失敗，時間治療撕心裂肺嘅傷口，女人當自強，傷心過後重新振作，雖然首場撞正傷感清明節，但小恩子卻想將色彩帶畀大家。

「演唱會主題想帶出色彩繽紛嘅世界，我希望香港人可以開心啲，依家個個都好似好灰，諗嘢好負面，成個環境好多怨氣，唔一定係政治，可能買樓好貴諸如此類。」講到香港人買唔到樓，小恩子都好無奈：「我覺得...儲吓錢囉，未雨綢繆係必需。」小恩子諗番16年前告別騷，好似差啲嘢咁做得唔好：「係咪好神奇呢，你唔會預料到，16年後個天安排再畀一次機會，我會更加做得好啲，彌補上次不足。」

回首過去16年，小恩子坦言：「結婚、離婚，人生低谷乜都過晒，所以心態非常之平淡，少少唔開心梗有，但諗嘢唔會好灰，點解咁儍要唔開心，日日苦口苦面。其實好多女fans話同我處境一樣，都係單親媽媽，我覺得唔一定係失敗，可能大家性格唔夾，有時我都會私下訊息鼓勵佢哋，唔係冇咗一定好衰，可能你冇咗，行返出嚟好開心呢！」

新歌《剩下光年》有句歌詞：「就欠一點點的生死戀」，45歲嘅小恩子仍想再愛一次：「根本我個人就好鍾意戀愛，次次拍拖都好轟烈，梗係希望有一個好錫自己，將來直到永遠，但好多嘢係天安排，唔到你話想要就有。其實我對於感情o依家嘢冇乜要求，去到呢個歲數搵個伴。成日覺得鍾意我嘅人，唔係鍾意我個樣，都係鍾意我嘅性格，我本身係麻甩佬，如果搵個唔係咁大男人嘅人，可能食唔住我。」

但單親媽媽子女大過天，首要條件要對方被子女接受：「你明啦！有兩個小朋友，都要佢哋接受嗰個人先得：『唔好啦媽咪，可能你有個男朋友，你會唔理我哋。』佢哋會咁諗㗎，分薄咗個愛，嗰時我有問：『媽咪生多個BB好嘛？』阿囡話：『唔好，我同細佬夠啦！』好好笑。」

要數過去最轟烈嘅戀愛，就是跟前夫曾智明：「都係回憶，o依家好似朋友咁，大多數都係講小朋友。」離婚後小恩子搵到自己嘅方向：「呢家要做啲有意義嘅嘢，我成日覺得夠食夠用，生活我好感恩，已經好好，同埋我嘅前夫對我哋好好，冇乜經濟上問題，可以幫吓其他人。」問到有冇教子女儲錢？佢話：「有㗎，一星期畀300蚊零用錢細佬，我話你唔使晒啲錢，媽咪會獎多50蚊畀你，佢就好開心。唔好諗住媽咪會有樓畀你，我係唔會畀佢，乜嘢都要佢靠自己。」

攝影：沈健程
攝錄：Teddy
場地：Hotel ICON唯港薈
化妝：Meegan Seak
髮型：Steve Shek@HAiR

精選娛聞，喺晒《娛果》
http://fb.com/appledailyent