電影《我的少女時代》於2015年風靡亞洲，捧紅王大陸、宋芸樺及李玉壐，爆紅程度僅次於《那些年，我們一起追的女孩》、《海角七號》，而《少女》嘅主題曲《小幸運》更無啦啦成為「婚禮必播歌」，雖然歌詞講愛情擦身而過，同婚禮好似格格不入，不過唔少新人仍然照播，今日有報道指，《少女》續集，將於暑假開拍，預計成本約2600萬港元，據知沿用導演陳玉珊同編劇曾詠婷，而男主角王大陸都會拍。

據報道指《少女》版權已賣俾電影發行公司華聯，所以續集唔可以再用呢個片名，王大陸照樣做男主角，之但係女主角仍在選角當中，續集嘅劇本已完成70%，主要係改編自知名漫畫，預計喺台中取景。

《少女》叫好叫座係因為時代背景，能夠呼喚起女觀眾嘅「少女心」，引起共鳴，而劉德華同言承旭亦有客串演出，加上電影對白，令人一聽就感覺青春故事好似總帶着遺憾，長大後才回想自己曾有多蠢，「我的願望，就是希望你的願望裡，也有我」、「很久很久以後我們才知道，當一個女孩說她再也不理你，不是真的討厭你，而是她很在乎你，非常非常在乎你」、「只有我們自己才可以決定自己的樣子」及「謝謝你出現在我的青春裡」。句句喚起昔日少男少女嘅心聲!