今時今日賣乜嘢產品都好講服務態度，但要點樣先贏到人？恒生銀行（011）零售銀行及財富管理業務主管陳力生（Nixon）最近就親身出馬，向下屬示範。

話說有個財富管理業務嘅客戶，對恒生軟硬件服務有啲不滿。呢件事畀Nixon知道咗之後，佢親自打畀呢個客仔，解釋當中存在嘅誤會，話日後會注意改善番呢啲地方。個客收到電話後都好驚訝，原來自己嘅意見受到銀行高層重視。
呢件事好快傳遍成間bank，Nixon話佢咁做，就係要向同事傳達一個強烈訊息，千祈唔好以為已經係最好而固步自封，「我都咁緊張，前線就應該更加緊張。」佢仲講明，日後如果可以，都會抽時間打電話畀客戶聽取意見。Nixon咁樣「身教」，啲細嘅又點敢唔留神？難怪恒生連續七年都被客戶評為全港最佳服務銀行啦。