近期熱播嘅tvN劇集《鬼怪》，由於係邊拍邊播，所以一眾演員都要趕住開工，早前更有傳聞指孔劉過勞入院、李棟旭亦吊鹽水多天，就連導演都冇得休息。而劇集本來逢周五、六播出，幕前幕後亦要趕工喺一星期內拍完，如果唔係就冇得播，可見拍攝情況相當之緊迫。

據《Starnews》今日嘅報道指，有相關人士透露：「《鬼怪》劇組目前仍拍攝本周播出嘅第13、14集內容，照咁嘅進度，應該下周六結局(第16集)當日先會進行第16集嘅拍攝。」

由於有唔少傳聞嘅出現，孔劉方面今日解釋：「由於《鬼怪》要趕工，劇組嘅所有人都好攰，但有指孔劉過勞暈倒或者健康有異常嘅傳聞，都唔係事實。」

此外，《鬼怪》方面今日指原定本周六播出嘅第14集將停播，改以播出特輯代替，而第14集將於下周五播出，而下周六將連播2集。劇組指：「由於加入咗新嘅場景以及高難度嘅拍攝、CG效果，導致後期製作時間上出現困難，為咗回報觀眾嘅支持同喜愛，亦為咗觀眾能夠享受喺一般電視劇中睇唔到嘅高質量畫面，所以決定停播並播出特輯。」