噚晚娜姐周秀娜擔任港台中文金曲頒獎嘉賓頒發最佳進步獎時，直認分手。馬上變成「ex」嘅陳偉成Avis一聽到娜姐講分手，就post黑白相，寫住「………」。唉，咁佢哋咁多年情就玩完喇。不過究竟佢哋分手原因係咩呢？

今日有報道就話，娜姐分手、同陳偉成Avis過唔到7年之癢，原來係同方力申有關，事關佢兩個行得好埋呀！仲搞喊鄧麗欣(Stephy)添。

32歲嘅方力申同29歲嘅女友鄧麗欣拍拖9年喇，已經過咗7年之癢，近期佢哋齊齊北上搵銀，不過因為遲遲都未傾婚事，而大家又經常分隔異地，令大家感情亮起紅燈。日前小方喺北京出席電影劇《唐朝浪漫英雄》嘅新聞發佈會，小方同娜姐更影咗張攬頭攬頸相上載微博，擺明曬命！據知，小方同娜姐因為拍電影劇《唐朝浪漫英雄》而一拍即合！唔怪得娜姐會同男友Avis分手啦，原來有對手。

小方就「爽YY」，Stephy嗰邊就「慘drydry」喇。報道指，身在橫店拍劇嘅Stephy，日前同好友洪天明、周家蔚食飯時喪爆飲酒，借酒消愁。飲飲吓，傷心嘅Stephy竟然喊起上來，天明等人即時上前安慰，睇來係為小方冷待佢嘅事而傷心不已。

其實早於上個月初，Stephy已係微博寫透露感情有變：「最傷感的事不是離別，而是離別時沒有好好的說再見。」至於小方反而好決斷，係微博上暗示「後悔當初的選擇」。