王宗堯同楊淇今日喺尖沙嘴出席活動。日前，蕭定一旗下嘅HMV被指欠租，仲要將物業四度加按撲水，王宗堯坦言有留意新聞，但唔擔心公司前途：「冇嘢嘅，唔死得，要死都冇辦法。」王宗堯話會同公司一齊行落去，認為蕭定一o依家唔係需要金主、白武士，而係朋友：「落難嘅時間，最緊要有朋友。」

問佢會唔會收少啲人工同公司共度時艱？王宗堯就話：「唔講呢啲啦，總之錢同其他嘢都可以慢慢傾，我同老闆講唔使擔心我。呢個圈好多嘢、好多人…唔使有風駛盡𢃇。」佢仲話公司有啲project未推出，希望可以盡快做晒啲後期面世，因為有嘢出街先有錢，又可以畀到信心大家。

佢仲話以前藝能都試過破產，全靠校長譚詠麟同曾志偉拎錢出嚟撐住：「朋友先會無條件幫忙，所以o依家朋友最緊要。」

至於黃子恆再爆出食女新聞，問楊淇有冇試過畀人誘惑？佢笑言得王宗堯叫佢上屋企飲酒：「不過佢自己飲到瞓咗先，我哋仲畫佢手臂。」王宗堯笑指因為楊淇唔係大台藝員：「大台啲人紅得快、叻仔，所以會身痕，有錢就身痕。」

精選娛聞，喺晒《娛果》
http://fb.com/appledailyent