當年今日
關於我們

【萬分荒謬嘅世界】同閃靈樂隊視像合唱 何韻詩:已經冇形容詞可以形容呢個政府

蘋果日報 2018/12/25 23:23

Freddy何韻詩我們正在閃靈樂隊

何韻詩喺科學園搞「On The Pulse Of 我們正在」音樂節,原本前日下午輪到台灣閃靈樂隊表演,但係入境處一直都未批閃靈樂隊嘅工作簽證,所以最後閃靈樂隊嚟唔到現場表演,到咗今晚,何韻詩就喺台上話要送一份禮物畀大家,佢話:「大家都知道,我哋o依家活喺一個萬分荒謬嘅世界入面,本來前日嘅音樂會,本來有一隊台灣嘅樂隊過嚟,但係因為一個...我都唔識形容,用咩字眼好呢(台下觀眾大叫『荒謬』、『戇X』等等)已經冇形容詞可以形容呢個政府,我講少少發生咩事啦,本來閃靈樂隊要嚟參加呢個音樂節,申請咗個幾月,一路都冇音訊,開騷前都冇回覆,咁我哋惟有放棄啦,因為攞唔到簽證,到個騷完咗,佢哋就畀咗回覆,因為申請嘅呢一班人嘅技能唔夠特別,佢哋嘅技能香港已經有,所以唔可以過嚟。我發現原來以前請嚟香港嘅外國歌手,原來係有特異功能嘅,原來我哋嘅政府係必需要呢啲申請嘅朋友,係要有奇人奇技,噴火同吞槍都唔得,因為呢啲香港有嘅,因此佢哋嚟唔到。」
之後阿詩再話:「我後來發現呢,佢哋真係有奇人奇技嘅,因為佢哋今晚嚟咗,透過腦電波嘅發送,我哋係請到閃靈樂隊嘅Freddy先生同埋結他手小黑,嚟到呢度。香港政府,閃靈嚟咗喇。」之後閃靈樂隊就喺大螢幕出現,主音Freddy就話:「先跟大家說一聲抱歉,我也不是故意沒有特異功能,一直在想第一次跟何韻詩合唱這一首歌,會是在甚麼嘅情況下,但沒有想到竟然是網絡連線的形式,這幾天我學到一句廣東話,就是『我都冇晒特異功能喇,仲留喺度獻世咩?』」呢句就係《賭俠》入面大軍嘅對白。
然後佢哋嘅網絡連線出現問題,唔可以喺大螢幕出現,要用電話打視像畀閃靈樂隊,再用攝影機拍住電話先可以喺大螢幕畀觀眾睇到,最後阿詩同佢哋合唱咗《烏牛欄大護法》。
精選娛聞,喺晒《娛果》
http://fb.com/appledailyent
empty
冇得嚟香港,但科技可以令佢哋同台!(攝影:沈健程)
empty
阿詩:「我哋o依家活喺一個萬分荒謬嘅世界入面。」
empty
喺大螢幕同大家見面
empty
中間連線出現問題
empty
最後要影住部電話