當年今日
關於我們

地產多聲道:定息拆息呢期諗得過

蘋果日報 2004/04/13 00:00


經絡集團話,近來用定息與拆息做按揭,有增多趨勢,佔六個巴仙係用呢兩類息率,舊年就少到冇咁滯嘞。
固定利率一般係首年一厘二八;銀行同業拆息,就有機會低到唔使一厘。
例如最近海怡半島,作價四百萬嘅高層單位,首年定息做一厘二八,其後全期P減兩厘六五。
至於康怡花園,有個三百萬高層,攞到三個月拆息加零點八厘,之後可以再續或改用其他按揭產品,甚至直情揀全期P減兩厘六五。
講番康怡例子,以上周拆息零點一三五厘計,即零點九三五厘,着數不言而喻。問題係今季唔知下季事,利率環境話唔埋向上定向下。
不過其後息率之低,係舊年所無,唔怪得多咗人做定息及拆息。

上海樓來港兜售
本港股市樓市升咗近一年,好多人賺到笑,投資出手都豪爽啲,所以海外與內地投資物業湧嚟香港放售。
好似上海虹橋君悅花園,請得置華物業在港代售,意向價四百萬美金,約莫三千萬港銀,計落都係等於香港一個似樣啲嘅豪宅價錢。
君悅花園由內地企業上海高登聯合建設持有,共五幢八層住宅,另附商務中心及會所,96年入伙。今次推售嘅五號樓,十六伙,一五四六及一七七三呎,總樓面二萬八呎。
其中十三個連租約,租客為韓國、新加坡及日本等公司。月租近二萬二美金,回報六厘半,若全部租出,回報八厘半。
中記工商舖部達標
樓市全面向好,中原地產工商舖部今年頭三個零月,已經做到一億零二百萬佣金,差唔多等於舊年全年一億四千五百萬條數。
難怪部門阿頭陳雁樓,對超額完成今年定下嘅目標充滿信心啦!
既然生意咁好,自然要慶祝吓,工商舖部趁今日每月主管月會,順道喺尖沙嘴五星級酒店食晚飯,慶祝一番。

代理租舖被「晾」價
樓市好景,代理行賺大錢之餘,重大事擴充,四出搵舖位開分行。蘭西聽講,舖位業主,見租客係代理行,即刻吊高嚟賣,有啲重專登搵埋佢嘅對手,用入標方式競投,實行價高者得,賺到盡。
若果淨係以舖位面積嚟計,呎租比起隔籬自然貴到飛起,極之唔合理。不過,代理行條數就唔係咁計,係睇嗰舖位可以帶嚟幾多生意,即係有得賺,就算畀貴啲租,都冇所謂咁解。
據聞有啲分區高層,近排多咗行街,原來就係睇吓邊啲位適合開分行,若果撞啱就快交吉,就嗱嗱聲斟租,唔好俾同行捷足先登,或者要畀貴啲租。
蘭西
電郵地址:[email protected]
empty
虹橋君悅花園意向價三千萬。
empty
陳雁樓有信心今年生意掂。