就算網站講明係亂嗡24，content farm（內容農場）嘅故事好多人未求證過，就爭住share，最近一單係：方力申2018年娶Stephy（前女友鄧麗欣）。不過呢單所謂嘅「獨家突發」，已經俾小方否認咗。（新聞連結： http://bit.ly/2foC736 ）

咁小方係咪絕口不提Stephy呢？唔係，就算分手咁耐，都仲好保護對方。早前小方同蘇麗珊為葉念琛新戲《愛情奴隸獸》宣傳，小方就展露咗佢呢一面喇。

小方喺戲中要飾演高海寧嘅愛情奴隸獸，佢話：「我要喺銅鑼灣跪喺佢面前被佢摑，都係快閃拍，因為都有啲尷尬。現實中我梗係唔係奴隸獸啦，但我好明白嗰啲做奴隸嘅男仔，對佢哋嚟講係愛嘅表現，佢哋甘願俾女仔食住。」問到佢有冇試過俾女友食住？小方即說：「我冇，Stephy唔係啲咁嘅人，我係行暖男路線㗎。」

蘇麗珊聞言即指小方好細心：「佢成日撩我講嘢，佢其實個個都撩，男女都撩。」小方即自豪表示看過蘇麗珊男友嘅相，又大讚對方。至於蘇麗珊有冇問小方交換女仔相？小方即搶答：「我咁有經驗，點會咁易交換相呀？」蘇麗珊亦笑謂：「佢好官腔㗎。」