對於中美領導人會晤，紀惠集團行政總裁湯文亮認為，中美貿易戰絕對沒有緩和跡象，這只是戰場上的快樂新年，現在只是休戰三個月，而在這三個月之中，中國要向美國購買大量農產品，特朗普又可以向農民交差，這次延期，對美國的利益大過中國，但這亦是好事，起碼暫時不會再惡化。不過如果香港人以為貿易戰完畢，對樓市的負面因素消除，就大錯特錯，因為影響香港樓市的負面因素還有很多，例如加息，供應增加，資金外流等，樓市向下調整剛剛開始，不過，就算延期30天始終是好事，或者可以減慢下跌速度。

他強調：「實情唔能夠用傾掂(中美貿易戰)呢個字眼，市民唔好以為樓市的陰影消除，就算而家(中美貿易戰)無惡化，以往關稅造成的影響仍未反映出來。未來3個月唔會再惡化，始終人民幣貶值咗10%，叫仲捱得住。但我哋有好多次無跟隨美國加息，有8次，有約1.875厘要追加，當資金流走時，香港要追加，一追追近2厘，對業主來講，好犀利。雖然估計資金唔會太快流走，但始終有個陰影。」

他續稱，就算無加息，供應方面，尤其政府推出的新樓空置稅影響很大，逼發展商清存貨。他估計：「樓市跌，真是跌呀，而家先開始跌，所有影響樓市的因素都未到。未加息，供應未正式來，而家仲逼地產商賣樓。我估計農曆新年後，大量新盤供應，大型發展商長實(1113)、新地(016)會減價，呢啲是慣常做法。過去2個月，購買力未郁，市場只是賣緊垃圾單位，只是小型地產商賣樓咋嘛，個啲單位，物業代理唔會同你做，佢哋有客都留返過年後幾間大地產商的樓盤先去做。我睇，新年後新盤，發展商透過增加優惠，變相減價一成，因為無減價一成，無人會買。」

他總結，中美貿易戰停火3個月，暫時不能夠說是利好消息，如果覺得這是利好消息而覺得「而家可以買樓囉!」咁比較倉卒!