雖然無綫拱手讓「領導先走」——個劇俾大陸先播，但「恩主們」未必領情0架。有網民喺百度同豆瓣出帖，列出上月30日晚上7點半至凌晨12時大陸主要電視台之收視，排第一係央視綜合頻道《最美的青春》，收視率係1.322%；《再創世紀》收視率只係得0.379%。

有網民歎：「內地不喜歡商戰題材」、「時代不同了」、「昨晚我十點多看完兩集專門去看了下，發現國語版才九百多萬點擊量，粵語版更慘，二十多萬……希望漲上去呀。」香港網民未睇已經話：「改錯名，應該叫《一帶一路再創世紀》。」

也有大陸網民稱：「我是直接在愛奇藝看的，港劇的受眾和央視的受眾不一樣啊。」咁就睇睇網上點擊率啦。根據國內一間「專業娛樂資料和行銷策略顧問公司」Vlinkage公佈嘅數據，上月30日網劇點擊率，排頭位係已經大結局咗嘅《延禧攻略》，有逾3億3千萬點擊，《如懿傳》以2億2千萬點擊屈居第二，排第九嘅《再創世紀》就只有1,400萬點擊；第二日好啲，繼續係《延禧攻略》排第一，《再創世紀》就有2千萬點擊，都係排第九。

Google一下，早於去年已有網民預測《再創世紀》收視唔會標青，第一個死因係，又係續集！就好比當時播緊嘅《溏心風暴3》，仲玩緊家族爭產呢條路數，觀眾已經頂唔順。其次就係，《再創世紀》搵唔番原班人馬，冇陳錦鴻冇羅嘉良冇郭可盈冇陳慧珊，結果要郭晉安一夫當關，加埋林文龍楊怡鍾嘉欣，變晒味。

亦有眼利網民發現，無綫版本播出36集，愛奇藝版本就刪減成34集。點解要減呢？估下囉。

至於大陸網民睇完：
．TVB沒落還用證明？我港劇迷都棄幾年了，陸續看了幾部，沒看幾集就棄，真的不好看。
．《延禧攻略》網播照樣爆，《再創世紀》沒人看就是沒人看。
．其實有點失望的，原本還指望TVB的劇能夠探索出一條走向内地的路，結果失敗了。
．為了迎合内地口味改變了港味。所以不好看了。
．TVB現在還有甚麼？有點只是對老一輩藝人的情懷，新人撑不起場面。現在TVB的藝人誰認識啊？