年初六（二月十四日星期一）原來好多人冇返工，大概因為今年嘅開工吉日係年初七人日。左丁山喺星期一休息，中午到馬會飲茶，以為人哋返工我放假，實有位啦。錯，凱旋廳內全部坐滿，幾乎搵唔到位。行吓行吓，碰到酒樓Ｃ與朋友，原來佢哋約埋到沙田聚會，本來約咗去前敦煌畫舫（現稱明星海鮮舫）飲茶，點知「明星」爆到七彩，水洩不通，惟有臨時改咗去馬會。酒樓Ｃ話：「明星以平出名，又有停車場，故此好受人歡迎，但諗唔到爆到咁犀利。」
與酒樓Ｃ講酒樓業趨勢，佢話第一個頭痛係請唔到點心師傅，做師傅要學習三四年，年輕人唔願意早上四時起床，五時返到酒樓開工，老師傅移民、退休、跳槽嘅話，極難搵人替補，呢行正是有工冇人做。

第二個頭痛係零售業興旺，搶咗好多酒樓職工，因為零售工作，點都會比酒樓工乾淨啲，輕鬆好多。第三個頭痛就係潮流不斷轉變，人人要話多吃健康產品，但佢哋試過減少色素、降低豬油用量嚟做點心之時，人客又話唔好食，令佢哋無所適從，最後決定不變應萬變。
香港人好多時口不對心，唔信得咁多，譬如以前好多教育界人士贊成母語教學，但又爭住辦英文中學。啲學生爭住入英中，一小撮自英中進入中大之後，就反對選擇性用英語授課，令人莫名其妙。
酒樓Ｃ講完趨勢，提到大酒樓經營不易，俾酒店搶去不少婚宴酒席生意，中午茶市旺極都唔會賺大錢，好似美心集團已逐步退出大型屋邨粵式酒樓生意，租約滿就選擇性退出，集中資源搞北方菜，因為北方外省菜利錢好啲喎。