花旗股市急升兩日後，前晚反覆微升，向上動力減弱，睇嚟可以用的藉口已經用完，𠵱家係等淡友反攻，無論從經濟、樓市同美元嚟睇，花旗股市都冇能力企喺呢個水平，大插只係時間問題。
大家有冇留意到聯儲局同歐洲央行自從幾個月前向市場注資到𠵱家，從未停過，點解？因為銀行業喺次按嘅氹太大，啲錢蝕咗，或變成壞賬，邊有錢填番條數，如果唔係，全球Numberone嘅花旗集團都唔使借「貴利」，畀11厘息同油王借錢啦，其他金融機構好似美林、貝爾斯登、霸菱、滙控，仲有房利美同房地美等，真係有排數，個氹幾時先填得番，真係唔好諗得咁樂觀，其實伯南克好有良心，已經坦白話畀大家聽花旗經濟同樓市嘅前景係點，如果咁都收唔到，真係冇人救到你。

正股破位睇170元

港股乜嘢時候都可以炒，只要問自己會唔會嚴守止蝕，不過千祈唔好太博，因為𠵱家仲未係博嘅時候。短炒博啲乜，暫時係地產股佔優。
長實C輪9712：長實（001）昨收146.30元，再升2.4巴仙，技術走勢靚已經唔使拗，如果升破149元，上試高位159.50元應該唔係問題。
長實C輪9712昨收27.5仙，槓桿率5.3倍（有效3.6倍），溢價11.8%，仲有248日先到期，對冲值0.67，正股升上159.50元，9712應該唔會低過37仙，有34%升幅，正股破位就睇170元，到時隻輪會見45仙，正股跌穿138元止蝕。