鄭欣宜開設嘅曲奇甜品專門店，今日喺銅鑼灣開幕，好友許廷鏗、胡鴻鈞同鄭融都有出席支持。正式簽約華納嘅許廷鏗，由華納經理人陪同下首次現身，不過，做電子媒體訪問，離開咗無綫嘅許廷鏗，就第一次接受有線訪問，而無綫雖有派員到場採訪，但就冇訪問許廷鏗。

提到許廷鏗做華納一哥，佢即刻話：「唔係一哥，我都希望事業有新進展，突破一啲嘢，今日正式公佈去華納，我係音樂起家嘅人，歌唱比賽出身，想用音樂去做一啲嘢，日前出咗新歌預告片，12日出新歌，新公司好配合我同支持我，所以我喺音樂嘅發展非常放心。」之前有傳佢唔簽華納，想開自己嘅工作室，o依家開唔到會唔會唔開心？佢話：「一直都冇呢件事，一直都傾得好順利，傳聞不攻自破。」佢仲語帶相關話：「之前好多曝光，比重喺劇集上面，嚟緊都希望多啲唔同音樂嘅發展。」有傳佢被列入無綫嘅黑名單？佢話：「呢啲係炒作，我好感謝公司對我嘅栽培，希望日後有機會再合作，呢個世界係圓嘅。」稍後有新歌推出，會唔會去無綫宣傳？佢未有正面回答：「我梗係宣傳啦，我點解唔做宣傳呀？」

欣宜就話終於有自己嘅曲奇餅店，問到投資咗幾多錢？佢笑笑口咁話：「我唔講，因為唔清楚，其實試業咗半年，一直都未有時間搞開業，咁啱朋友今日得閒嚟支持。」試業咗半年，賺錢未？佢話：「OK嘅，呢條係酒吧街，大家未知呢度有西式甜品店。」問到爸爸鄭少秋有冇試過曲奇甜品？佢表示：「佢好鍾意食曲奇，之前推出咗月餅曲奇，佢都買咗好多送俾朋友。」會唔會再開分店？佢話：「大家繼續支持，生意興隆啲就可以，希望到時喺九龍區開間大舖。」有冇叫爸爸入股？欣宜話：「唔好，我寧願叫啲朋友入股。」在旁嘅許廷鏗即刻話：「有傾過架，睇下有冇機會，分拆上市，分拆再上市。」