樂瞳、張紋嘉同張崇基今日喺新蒲崗為「星級發夢團」才藝大賽擔任擔判，樂瞳以前都參加過英皇新秀大賽，同屆有鍾舒漫同泳兒：「嗰時真係好淆底，啱啱喺英國讀完書返嚟，又細膽。我記得係同初戀男友成日去唱K，所以叫我去參加，佢都有報名㗎，但後來縮沙無去，不過我都唔係因為呢個比賽入行，嗰時16強止步啦。」

張紋嘉笑謂差啲忘記點入行，佢話當年冇參加過選秀活動，只係內部面試：「我當年喺大學係舞蹈學會，唱片公司想組隊跳舞組合，就嚟搵啲合適嘅人。」佢仲話自己當年係肥妹仔，被經理人話佢爆牙：「好似個炮仗放咗入口咁，真係好醜樣。我好羨慕啲人棚牙又白又齊，笑起嚟好靚。」

樂瞳同張紋嘉話會特別留意參賽嘅牙齒，樂瞳自爆當年都被經理人提議過裝牙套：「我覺得好恐怖，食嘢又要除出嚟。你諗下如果如男仔食飯，除牙套啲口水又黐住咁，好核突！」

精選娛聞，喺晒《娛果》
http://fb.com/appledailyent