被踢爆擺番支籤落竹筒再抽過
煲呔24年前求得下籤 - 李八方

蘋果日報 2007/02/19 00:00


仲記得肥平局長03年求得下籤嘅狼狽相嘛?嗰一支籤,令到唔少香港人惶惶不得終日,嗰年香港又爆沙士又23條,真係講番都欷歔。港人見肥平如見鬼,身為民政事務局局長嘅肥平亦從此絕迹車公廟求籤活動。都咪睇小呢支籤嘅魔力,無膽就真係唔好去幫港人求籤喇。但係唔講唔知,原來83年做緊沙田政務專員嘅煲呔,都試過求到下籤,好彩廟祝醒目先化解到。
前沙田鄉事會主席蔡根培噚日爆料,話說當年煲呔支籤係為沙田而唔係為香港求嘅,當佢求到支下籤後,都唔識點反應。廟祝鄧太一見到就即刻大吉利是,話支籤唔好呀,快啲送番車公爺,叫煲呔誠心誠意再求過另一支啦。
生命冇Take2,求籤就有喇,煲呔都驚遺臭萬年㗎,所以即刻偷雞再求過。呢次煲呔手氣順番啲,抽到支中籤,大意話係安居樂業,沙田居民個心都定好多。不過,當年正值中英談判氣氛最惡劣嘅時候,戴卓爾夫人就喺人民大會堂前PK,真係唔知同支下籤有冇關喇。
探婆婆問有冇睇西片
當年肥平俾人話身為教徒唔應該求籤,煲呔身為天主教徒都唔應該搞求籤呢家嘢。根叔仲話其實煲呔都好入鄉隨俗,仲肯跪喺地度好誠心咁求籤,點似得肥平咁企喺度求籤就算㗎。睇嚟肥平緣盡車公廟,自己都要負好大責任噃。
貴為特首,煲呔家陣梗係唔使再去求籤。幾乎日日為選舉出動嘅煲呔,噚日帶住老婆鮑笑薇去咗大埔林村家訪,同當地嘅鄉紳父老打打招呼。
煲呔鍾意叫人生三個,噚日佢聽到有個84歲婆婆有6個仔3個女24個孫之後,竟然話都唔係好夠多咋噃,真係嚇得大家一額汗,原來兩打孫都滿足唔到佢。驚魂未定,煲呔又有創舉。阿婆話閒時鍾意睇電視,煲呔竟然離奇問人有冇睇西片?阿婆聽到都O晒嘴,無奈話:「我唔識睇㗎」,其他人就哈哈笑為煲呔遮醜啦。
忽然自歎要打鑼搵仔
唔知係咪見到人哋一家大細住埋好鬼開心,自己同老婆住喺空框框嘅禮賓府舉目無親,煲呔一度好鬼感觸咁話,同太太年紀都大喇,有咩事,真係要打鑼打鼓先至叫到阿仔返嚟睇睇兩老,講到差啲流眼淚咁滯;跟住又頻頻話唔一定要送老人家入老人院,喺屋企一樣咁開心。新年流流咁呻法,唔知佢兩個仔聽到有乜感受呢?
empty
empty
髮線向上令煲呔都好擔心自己老年生活,見到婆婆兒孫滿堂一齊住,猛呻要打鑼打鼓先搵到仔仔理自己。曾顯華攝
empty
煲呔姓曾但好受林村人歡迎,噚日俾林氏鄉親拉住影大合照,當中仲有個小煲呔㖭。陳亮華攝