由韓劇《原來是美男》嘅30歲男星張根碩和韓藝璃主演嘅新劇《Switch－改變世界》噚日接《Return》首播，由於張根碩預告呢齣劇係佢入伍前最後一部作品，所以即時獲得唔少粉絲捧場，令佢劇集首播即登上收視冠軍，認真飲得杯落。

張根碩之前多齣劇集都慘遭滑鐵盧，被封收視毒藥，好似《愛情雨》同《漂亮男人》收視都唔多理想，前年嘅《大撲》雖然開播時做收視冠軍，但好快就被朴新陽嘅《鄰家律師趙德浩》超前。而今次張根碩就挑戰演技，喺《Switch－改變世界》一人分飾兩角，分別飾演檢察官及天才騙子，張根碩亦不負所托，噚日劇集開播，第1及第2集分別有7%及7.9%收視，成功獲得收視冠軍。

不過《Switch－改變世界》暫時只係險勝，同檔由權相佑及崔江姬主演嘅《推理的女王2》噚日播出第9集，收視比上周升咗2.1%，錄得6.8%收視，係開播以來最高一集嘅收視，有望今晚狙擊張根碩嘅收視冠軍寶座。韓惠珍同尹尚賢主演嘅《牽著手，看夕陽西下》噚晚播出第5及第6集，分別有2.7%及3.3%收視。

更多韓流，喺晒《娛果》
http://fb.com/appledailyent