高鐵「一地兩檢」問題爭議不絕，人大常委會本月開會批准同確認一地兩檢《合作安排》後，政府就會向立法會提交立法建議，屆時勢再掀起一場大戰。

而喺爭議聲中，唔少人都幫政府唱好一地兩檢，好似一直帶住小明周圍去嘅兒科醫生李家仁，最近又有新歌《小明搭高鐵》，用歌聲幫政府hardsell。李家仁話喎，兩星期前先收到個曲譜，佢今日即席向記者獻唱時，都仲要睇住貓紙。

佢話呀，家陣最擔心係點拍個MV，「家高鐵站都未起好，內地車廂又好難（拍攝），就算直通車都好多監控，好難拍到」，佢希望可以盡快諗到解決方法，以便農曆新年有MV同大家「拜年」。講返「一地兩檢」爭議，佢個人認為都無咩問題，最重要都係方便同舒服啫。