港股噚日回吐154點，屬健康調整，10月初以來恒指由低位反彈最多達4102點，如果以高位回調23.6%計，19300點係今次調整第一道防線，再向下望就係50日線水平18900，戰友入市時可作參考。
歐債危機暫時紓緩，中國亦有放水迹象，主打呢兩個市場嘅奢侈品股Prada（1913，普拉達），有望借勢炒上。截至今年7月底，Prada半年賺1.8億歐元，按年大增74%，亦好過招股書預期，其中亞太區營業額勁升35%，歐洲亦有18%進賬；集團表示，未來擴軍策略會聚焦亞洲，當中又以中國市場為主力。
與此同時，坊間傳聞另一個知名品牌美國的Coach，呢個月會嚟香港上市，Prada作為影子股，隨時有一番炒作。Prada噚日收報38.95元，跌3.8%，戰友可於早前密集區頂部37元水平吸納，上望42.50元，短線喺呢個區間炒波幅，回報吸引。
唐牛