老董辭職成套大戲，喺煲呔企出嚟宣布接棒達到高潮，不過中央順手畀咗個「炸彈」煲呔，新特首任期係五年定係兩年呢個問題，隨時將成個管治班子炸散。搞出呢個大頭佛出嚟，港官都有責任，點解當年制訂特首選舉條例時，唔問清問楚先呢？
政制事務局局長林瑞麟舊年五月五號喺立法會答卿姐提問，講到明「《基本法》訂明，行政長官的任期為五年。這規定適用於任何行政長官，不得有例外情況。」呢番話有立法會會議正式紀錄，係林瑞麟嘅「釋法」言論，不過喺前日記者會上，當梁愛詩侃侃而談新特首任期係兩年之際，林D9身為政制事務局局長，聲都唔聲冇「指正」詩姐，好似想扮隱形咁。
林D9作為問責局長，呢個責任佢有冇諗過負㗎？其實唔少政界人士都覺得喺中央頻頻干預情況下，政制事務局可有可冇，財爺唐英年喺下年度預算案中，不如殺局幫庫房慳番啲錢啦！

傳真︰2623-9278
電郵︰[email protected]