呢排好多公司排住隊公布業績，好似前個禮拜東亞銀行（023）派完成績表後，上個禮拜又輪到渣打集團（2888）。睇番銀行股業績，由於舊年香江經濟由谷底回升，無論係樓按或者商業借貸都明顯好轉，加埋呆壞帳減少，所以銀行股絕對有機會跑贏大市，班芬佬紛紛轉軚全面睇好。
有個做開基金「買手」嘅行家話，班芬佬對滙豐（005）嘅業績睇得好好，話3月初公布嘅盈利有機會達到100億美元，即係話較之前一年增長60%。佢重話，啲大戶為咗要執平貨，更不惜工本喺美國ADR市場砌低滙豐個收市價，再上下其手推低埋期指，等第二朝可以喺香港呢邊執平貨，所以上個禮拜四滙豐個ADR價無喱頭咁跌咗兩大蚊，但第二日又即刻升返上嚟。