韓國人氣綜藝節目《Running Man》成員HaHa孖音樂拍檔SKULL上周六受邀訪港，出席於紅館舉行嘅「Mega K MUSIC FESTIVAL 韓潮狂歡音樂節」，而活動前HaHa同SKULL就抽空接受本報訪問。

HaHa早前宣佈歌手老婆星陀緊第2胎，被問到長子Dream知唔知自己就嚟做哥哥，HaHa表示：「一開始講嘅時候囝囝就表現得好唔鍾意，但當佢知道媽媽真係陀緊細佬時，就變得穩重咗，亦好開心。」HaHa亦提到知道自己再為人父後嘅心情：「聽到消息之後，第一感覺反而係再有身為爸爸嘅負擔感、使命感，不過都覺得好開心好幸福。」假如未來囝囝想加入演藝圈會唔會反對？HaHa就表示：「如果佢本人真係好想做藝人嘅話，應該都阻止唔到，就好似我同SKULL咁，其實一開始我哋話要加入演藝圈時，屋企人都好反對，不過係自己想做嘅事，就堅持到底。」

好兄弟HaHa即將變幸福嘅一家四口，目前未婚嘅SKULL會唔會好羨慕都想快啲搵返另一半結婚？不過SKULL就同好堅決咁表示冇咁嘅打算，令一旁嘅HaHa都爆笑。而SKULL之前秘密來港為新歌拍攝MV，被問到再次訪港會想去邊度觀光，SKULL就表示：「雖然已經嚟過香港幾次，但喺香港演出都係第一次，所以都好興奮、好緊張。雖然我都好鍾意食嘢同Shopping，不過都鍾意去蘭桂坊同Club。」唔知HaHa又會唔會跟埋去呢？

HaHa今年拍攝長壽綜藝節目《無限挑戰》特輯「無限商社」時再次挑戰演技，不過HaHa就覺得自己仲未準備好，所以暫時唔打算向戲劇、電影方面發展。而HaHa同SKULL創作嘅音樂類型屬雷鬼風格，喺舞曲、Hip Hop當道嘅韓國樂壇中，二人坦言一開始的確好少人接觸雷鬼風格嘅音樂，SKULL：「依家有好多粉絲因為認識HaHa，繼而認識我，從而亦知道呢方面(雷鬼)嘅音樂，雖然仍然唔係好多人知，但已經慢慢多咗人去了解，所以都覺得好開心，只要我哋繼續努力就會有更多人知道、了解雷鬼音樂。」HaHa亦補充：「就係因為知嘅人唔多，所以會有種使命感，想將佢宣揚出去。」