蔡廐現役15匹四歲馬中，焦點當然是出道以來七戰五冠兩亞未失Q之「戰利品」，不過此駒每次出賽勢成大熱，加上評分已高，實在不用再多介紹。反而一批仍在四班之四歲馬更有長線捧場必要，第一匹係「明多多」，在港三戰兩度入位，初出跑直路賽沿途快放得季軍，僅負半身位，若非末段左片右片應已贏，反映本身走規仍未熟，尚有大幅進步空間，新季大一歲應是大熟黃金期，在四班53分起步，部署得宜可贏兩場才升班再求功。
另一匹可長捧之四歲馬乃「勁開心」，上季第二仗角逐田草1200米已造出22秒07之超快末段時間，肯定質素唔差，季尾加防沙眼罩後五戰更悉數跑入前四名，演出漸見穩定，三匹在港同父馬「川河猛駒」、「飛影」及「好靚仔」四歲時均有頭馬交出，「勁開心」絕對有力扶搖直上。