盂蘭節聽鬼故已經夠驚嚇，點知有啲人好大膽，百幾人今晚冒住大雨，跑過中上環一帶嘅紙紮舖、壽衣店、醫院，連曾經堆積過無數屍體嘅廣福義祠都去埋。莫非佢哋真係天不怕地不怕？如果冇虧心事，其實萬事無有怕，而呢班咁大膽嘅港人，都係參加「香港跑道節—盂蘭跑」應下節啫！

主辦單位「全城街馬」話呀，參加者喺經過呢啲同生老病死有關嘅「景點」時，需要代入做「長者」、「臨終病人」或「照顧者」身份，思考死亡相關問題，例如殯葬儀式、揀紙紮品，藉此畀比佢哋一次反思嘅機會，希望打破傳統禁忌，鼓勵年輕人勇於探討死亡。既能夠消減卡路里，又可以學到嘢，活動確實幾別出心栽，睇見佢哋跑到笑騎騎，仲百無禁忌影「車頭相」，相信都唔係驚。