社民連喺維園年宵賣諷刺民建聯無恥嘅「禮義廉」T恤，結果民建聯向海關告狀，海關諮詢埋律政司意見，決定以「有人違反《商品說明條例》」為由，直踩社民連攤位，仲充公115件T恤，扣貨但冇拉人就收隊。
事隔10日，社民連噚日就公開追究，指《商品說明條例》平時係用喺街市呃秤同女人街賣老翻嘅情況，佢哋呢件Tee貨真價實、直接諷刺民建聯嘅無恥行徑，並唔構成「虛假商品」。社民連噚日向海關發咗封律師信，要求7日內退還扣查嘅T恤，否則就提出司法覆核。

民建聯商標註冊屬服務類別

上任冇耐嘅社民連主席陶君行，噚日同長毛、黨秘書長季詩傑開記招解釋，原來海關扣查批「禮義廉」T恤，唔係根據同版權有關嘅條例執法，而係根據《商品說明條例》第7條(1)(b)，簡單啲解釋就係，如果件「禮義廉」T恤係民建聯出品，社民連盜賣呢款假貨先犯法。難怪阿陶頻頻話寃枉，皆因佢哋絕冇魚目混珠，反而係指名道姓話民建聯最無恥，消費者亦都清清楚楚，唔係嚟買乜嘢民建聯嘅產品。仲有，原來民建聯喺商標註冊時，係屬於可以搞展覽、刊物同講座嘅服務類別，唔係貨品類別，家引用其他版權條例話人侵權，都係無稽。
海關口口聲聲話做嘢之前徵詢咗律政司意見。長毛就話唔知海關徵詢咗律政司邊一級嘅官員，睇法律條文睇得咁唔清楚，斷估唔會係司長黃仁龍啩？佢更加想查清楚負責畀法律意見嗰位仁兄，同民建聯係咪老友。民建聯同執法部門溝通不嬲直接唔客氣，喺反高鐵人士包圍立法會時，葉國謙就打電話叫警務處處長清場；家搵海關做嘢可能亦係照辦煮碗，搞到海關被轟打壓表達自由。
mailto:[email protected]