當年今日

車路士失色 - 左丁山

蘋果日報 2007/09/22 00:00


睇英超聯直播,少不了會睇曼聯、阿仙奴、車路士、利物浦四隊。今季NOW直播每場賽事,場場有得睇,但問清楚自己,除非你曾在伯明翰讀過書,係伯明翰擁躉,否則點會有好大興趣嚟睇伯明翰對米杜士堡呢類球賽呀?
英超四大球隊除咗球星多之外,四個領隊費格遜、雲格、摩連奴、賓尼廸斯各有特色,各有不同戰略戰術,睇佢哋賽前互相冷嘲熱諷,有時好睇過場波。呢個星期我哋就若有所失咯,因為車路士在歐冠盃主場逼和弱旅洛辛堡之後,領隊摩連奴在廿四小時內辭職,BBC報道現任技術總監AvramGrant會補上,因為此君係大班主阿布莫域治嘅老友記。咦,摩連奴喺足球世界嘅戰績,遠遠超越呢位格蘭先生,第二啲唔講,單係領導車路士三年,就兩次攞英超冠軍,一次亞軍,一次足總盃冠軍,兩次聯賽盃冠軍,兩次打入歐冠盃四強(兩次都輸咗畀利物浦),戰績十分輝煌。而格蘭呢?以色列人,做過以色列領隊,以色列聯賽嘅球會領隊,好麻麻咋噃。
油王要炒摩連奴,左丁山起初仲以為佢會聘請率領意大利取得世界盃嘅領隊列比或者上季皇馬領隊卡比路,呢兩位絕對係重量級教練,而且賦閒在家,無合約在身,好適合領導車路士班大牌球星。不過天下老闆都係鍾意聽好說話嘅,用佢嘅親信格蘭,亦唔會感到意外,但長遠啲講,車路士有乜妙計與曼聯、阿仙奴、利物浦爭一日長短呀,格蘭都唔係雲格等人嘅級數。
摩連奴為人外表傲慢,好口出狂言,在球場邊七情上面,絕對係傳媒最鍾意採訪嘅娛樂性豐富人物。冇咗佢,豈止係車仔損失、球迷損失、傳媒損失,亦係英超聯嘅損失,連首相白高敦都覺得可惜。據講油王唔鍾意呢位葡萄牙人嘅穩守求勝方法,令車路士冇曼聯,阿仙奴嗰啲快上快落攻擊型漂亮足球,故此車路士雖有戰績,油王都唔多高興。換上以色列人做領隊,會唔會好啲呀?好難講,以色列人天生具備危機感,性格係先求不死而以突襲求勝,唔會有法國人(雲格)嘅浪漫情懷,蘇格蘭人(費格遜)嘅死砌性格,由格蘭做領隊,車仔今季不敢看好。