韓國女神全智賢近期無論喺韓國定亞洲其他國家都人氣爆燈，更先後贏咗唔少人氣獎，不過喺近日一個韓國最令人期待嘅回歸大螢幕女演員調查入面，全智賢竟然輸咗畀韓孝珠！

喺今個月8號至14號，韓國演藝圈專業媒體SNARN就同SNPOLL合作，以「清純代言人女星回歸大螢幕」為主題，針對將會通過新片《BeautyInside》同《暗殺》回歸嘅韓孝珠同全智賢進行咗問卷調查，吸引7萬6005名網友參加。

當中，韓孝珠就以5萬3593票（71%）嘅高票率勝出只得到2萬2412票（29%）嘅全智賢，成為令觀眾期待女演員。

另外，全智賢主演嘅新片《暗殺》近日再次公開新個人海報，只見著住白色喱士裙，頭髮蓬鬆嘅全智賢神情緊張咁揸住槍望出去門外，引人好奇。

而全智賢今日將會由韓國飛到深圳出席代言活動。