李八方online︱民建聯植潔鈴放棄選民 劈炮剷埋專頁 傳考督察
蘋果日報 2021/02/16 13:38
植潔鈴李八方online民建聯區議會
民建聯提出變革香港，搞行政、搞經濟、搞青年，話要培育新一代，不過民建聯可能自己都要變革一下，皆因內部已有人流失。2018年獲民建聯、工聯會重量級人馬助陣參加東區區議會佳曉區補選並勝出，做咗年幾區議員嘅小花植潔鈴，原來已經「消失」於地區喇。有傳媒就報道，植潔鈴去咗投考督察。挾著民建聯呢個背景，佢將來肯定可以喺黑警中平步青雲。
2019年區議會大選，民主派大勝，植潔鈴輸返個位出嚟，其後都仍然做區，連農曆新年都有現身喺小西灣本灣街市外嘅民記新年街站。事隔一年，民記喺同一地點擺站拜年，但桃花依舊人面全非，除咗正、副主席李慧琼、張國鈞、東區社區幹事陳凱榮撐場，地頭蟲植潔鈴已經唔見人。
知情人士透露植潔鈴原來已經「無做」，八方問過本身係港島立法會議員嘅張國鈞，佢都承認植潔鈴冇喺佳曉服務，但就拒絕透露由乜人代替，亦都拒絕回應植潔鈴仲係咪黨員。有地區消息話，工聯會李樂昕有意取代植潔鈴。
做過民記前議員鍾樹根助理嘅植潔鈴，最令人印象深刻嘅莫過於佢telegram頭像偷用前青年新政立法會議員游蕙禎嘅相。佢去年11月仲聯同幾名建制派女將開台直播，不過做咗幾集至個幾月前就冇再見到佢，Facebook上亦不見佢公開專頁，只餘個人賬戶。佢本來用開嘅聯絡電話亦由一名女士接聽，對方話係「辦事處」，八方表明想搵植潔鈴，但對方話暫時唔會搵到佢。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！