翻查六月份摩潘合作成績，十戰四冠四亞一季，落第也跑第六，入Q率八成，今戰（16日）摩廐出馬12匹，共有三駒交潘頓搏殺，其中「天外天」機會最睇好。

第六場三班1400米：可揀範圍唔多，「競駿天驕」屬不二之選，近仗穩定性好，回足氣有六個星期儲體力，五課單跳，埋門再落草地姿態不浮不躁，無論精神、狀態都啱啱好，馬房保養應記一功。

上仗贏馬加七分，實際今仗只加四磅，抽五檔起步即守好位，兼有手風大順的潘頓，贏馬條件集於一身。上仗彈甩「美麗日子」，不費吹灰之力，姿態有餘未盡，亦可以講潘頓騎人馬特別夾檔，唔搶口而知道發力點。

對手方面，「良才」要放頭跑得順才可發揮威力，但並不易控制，計潛質「請跟我來」最有機會挑戰「競駿天驕」，但上仗守好位末段鬥落一滴都冇，賽後報告雷神毫無解釋，就算復課試閘有走勢，始終都有戒心。

再諗抽二檔「傳奇」，純粹因為手執靚檔。

第十場三班1800米：一再指出「神亮金剛」屬韁口敏感極難控制的馬，上次潘頓騎贏馬看似清脆利落，再睇翻對面直路一度昂首失控，若非賽前連課快跳摸清楚馬性，要贏一場頭馬並不是易事，今次換何澤堯，除非早段有超快步速幫助，否則真係要考考何澤堯韁繩留放，屬有能力而存在隱憂的實力馬。

今場潘頓揀當日跑第三的「天外天」，秤上仗可以話完全無威脅能力，但三歲已能夠贏1800米，進步空間可以好大，上仗潘頓跑得叻，轉彎已壓住對手來跑，今次換轉角色，潘頓既知道「神亮金剛」弱點，在「天外天」發揮上可有不同演繹，馬膽秤先。

配腳「馬索爾」，走勢開始見好，抽三檔走位比較靈活，「開懷大少」夠準，可加入戰團。

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】6月17日起 繼續撐蘋果
請往蘋果日報網站了解更多