無綫同愛奇藝嘅合拍劇《踩過界》（大陸叫《盲俠大律師》）嘅第二季，喺前晚首播，大陸已經可以一次過睇晒14集，不過無綫喺嚟緊呢個禮拜仲係播緊首季嘅13同14集，第二季就要過多一個禮拜先會播！

查實喺第二季裏面，劇情都係跟住王浩信同朱千雪呢段情而發生，因為受到爹哋單立文嘅棒打，朱千雪唯有放棄呢段情，去美國讀書，本來佢已經決定同翟威廉結婚，不過最後知道咗一啲真相，於是逃婚兼離開香港！喺最尾嗰幾集，朱千雪發覺自己唔可以忘記王浩信，於是決定返香港，佢仲鼓勵王浩信做手術，幫佢植入晶片重見光明，點知喺王浩信拆紗布嗰日，朱千雪被殺，張振朗疑係兇手！

原來翟威廉注資咗單立文間公司後，發現賬目好混亂，於是搵咗張振朗私下調查，單立文發現之後，假冒翟威廉約張振朗去貨倉見面，諗住殺張振朗毀滅證據，點知朱千雪知道後，亦都偷偷去咗貨倉，混亂間疑似被張振朗開鎗殺死，啱啱趕到去貨倉嘅王浩信，一時間好難接受，好後悔封閉自己，點解唔同朱千雪講自己嘅感覺！

王浩信深信張振朗係殺人兇手，反而李佳芯相信張振朗係無辜，一方面佢為張振朗做辯護律師，另一方面又希望王浩信可以消除心魔，用四感去還原事實真相，為朱千雪緝拿真兇，亦為好友洗脫嫌疑！蔡思貝一直都好唔諒解王浩信嘅做法，所以佢不惜協助張振朗逃獄，甚至仲俾埋自己啲私己錢，希望助好友過難關。

喺一個意外嘅情況下，李佳芯知道有一件證物可以幫到張振朗脫罪，點知同時間單立文諗住去毀滅證據，原來佢先係真正嘅兇手，係佢錯手殺咗朱千雪，李佳芯自己走唔甩，於是乎搵咗一個地方收埋呢個證物，希望王浩信可以搵到，點知李佳芯亦俾單立文推咗落懸崖，但係王浩信真係搵到證物，不過為咗令單立文入罪，王浩信冇交俾警方，反而捉咗許家傑威脅單立文，叫佢認罪！

點知單立文走去捉咗蔡思貝用嚟交換人質，最後蔡思貝諗住同單立文一拍兩散，但係最後反而連累埋王浩信，結果佢哋差啲俾單立文活埋！不過呢啲全部都係一個局，王浩信用自己副復視鏡，將影像直播喺社交平台，設局去令單立文自爆殺人，所以最後同蔡思貝可以及時逃出生天，張振朗亦無罪，單立文成功入獄！