獨立創作歌手吳彤，今日突然喺社交網撰文宣佈，離開香港，要返回加拿大發展，好多網民都留言鼓勵，及送上祝福。

吳彤於04年出道，兩年後獲得廣州電台金曲金榜「最有潛力歌手獎」，相信吳彤最令人印象難忘嘅事，就係13年佢喺喺新城電台節目中，公開承認是同性戀者，係繼黃耀明，何韻詩之後第三位香港公開同性戀藝人。(新聞連結： https://bit.ly/2yLS0NN )

擁有加拿大籍嘅吳彤，今日選擇離開香港，重返加拿大發展，佢喺社交網撰文：「感謝香港給我的一切。實踐了音樂夢想，賺取了工作經驗和收入，認識了難能可貴的朋友，嚐過了刻骨銘心的愛情。
回加，不是一個容易的決定。在香港或許能夠擁有一切，但回加是希望能夠擁抱生活。每個城市都有它的好與壞，正如沒有人是完美；最重要是好好了解，自己的需要和想要。也許回加後，工作上會較少優勢，生活上要重新適應；但人生從來就是，由無數的旅程所組成，面對失敗不算什麼，放棄嘗試才更難過。謝謝大家，謝謝自己，接受我的任性。我並不完美，但我會繼續為幸福而努力。2018年6月26日，在加拿大溫哥華，正式開始新一段的人生旅程。」

《蘋果》剛才聯絡到吳彤，佢話自己本身都係加拿大長大，返咗香港生活十多年，之前主要係為做音樂而返香港，o依家都圓咗自己嘅理想，近年都已轉做Marketing，都係鋪路準備返加拿大做該類型嘅工作，希望有更好環境同舒適生活。「同埋父母都已經年老，唔能夠半年香港，半年加拿大，都要呢一、兩年做決定，係咪全家搬走，覺得最好嘅都係搬返溫哥華囉，因為全加拿大最暖嘅地方就係溫哥華，同埋嗰邊相對地係多中國人，相對地適合父母長住，呢個就係最主要嘅原因。」

吳彤除咗為父母着想，佢亦有為自己將來作打算，佢話：「當然就係將來搵到一個啱嘅對象，可以結婚同領養小朋友，呢樣嘢喺香港嘅機會係比較細，相信未來呢幾十年，香港(同性婚姻)唔好話結婚，連平權都比較難，去到加拿大唔一定會結婚，但起碼可以選擇自己結唔結婚囉！」

精選娛聞，喺晒《娛果》
http://fb.com/appledailyent