中環ifc引入AppleStore，又多名店，日日逼爆人，一樓中庭近日有個「國金福地」小花園，唔係亭台樓閣咁簡單，原來係風水陣。精通風水嘅建築師蔣匡文話，去到順時針行個圈，龍年行大運！
國金福地以江南庭園為藍本，地下有個大福字，左上角同右下角有凉亭，右上角則有一個假山水池，利用藍色閃燈營造流水效果，地上福字右邊口字位置，鋪咗一幅五蝠臨門圖案，四周有多棵桃花。
蔣匡文同八方講，從風水學嚟講，「國金福地」面向落地玻璃，外面係維港，水為財，幫商場吸客；五蝠臨門則代表妻、財、子、祿、壽。從建築學方面，佢話中文嘅園字入邊，上為土，即假山；中為口，即水池；下面則有植物，所以呢個風水陣fit晒傳統庭園建築理念，美中不足係個水池太假，建議擺部大電視播游魚片段，咁就風生水起。