河國榮噚晩喺九展為自資嘅《31。31 dare to dream 河國榮音樂會》演出，噚日係河國榮啱啱嚟咗香港31年嘅日子，佢話今次音樂會冇乜嘢大嘅主辦機構，主力自己同太太做搞手：「好多謝太太，最重要係我太太，音樂會冇咗佢唔得，I love you。」

河國榮喺唱《當年情》嘅時候，神秘嘉賓古巨基出現同河國榮合唱，唱完首歌古巨基話：「好戥河國榮開心、感動，一位外國人30年前嚟香港有一個音樂夢想，30年後可以開一個廣東話音樂會，佢真係等咗三十年，驚佢今晚好激動會喊。」

兩人重提大約十年前在錄音室偶遇情況，古巨基話：「我哋喺無綫應該冇合作過，但可能佢嘅電視劇由細陪住我大。當日自己去錄音室係錄歌，後來得知河國榮專登租一個錄音室練歌，鍾意唱歌可以去k房咪得囉，使乜專登book個錄音室練歌，於是大家就傾咗陣偈。」

基仔仲話：「河國榮仲問我點先可以搵到自己把聲音，我當時答佢唱吓唱吓就搵到，其實個答案冇乜建樹，但當其時見一位外國人咁有心去做呢件事，一定要畀支持，所以今日我一定要嚟。 」兩人合唱《友共情》，歌曲中有英文rap歌詞，唱完之後古巨基忍唔住話：「我冇諗過係一個鬼佬面前rap咁多英文。」

另外一位嘉賓雷琛瑜(J.arie)，佢同河國榮早年拍攝電影認識，兩人至今仍維持好友關係 ，兩人分別自彈結他合唱《緣份》。

精選娛聞，喺晒《娛果》
http://fb.com/appledailyent