【新增動新聞】

6月倫敦住宅大廈Grenfell Tower發生大火，一眾球員及名人襯國際賽期踢番場慈善賽為災民籌款。最爆嘅首推曼聯領隊摩連奴守龍門！摩佬同平日一樣面口嚴肅，不過54歲嘅佢絕不欺場，飛撲手槌做到足，起碼拎到姿勢分！

呢場波除咗球圈人士，仲預埋救災義工、居民玩，非常有意義。摩連奴今場波係入替前英格蘭國門占士，為舒利亞隊守龍。今場參與嘅球員仲有高治、哥利摩亞、列納、冼佳亞、施文、基雲咁，名人方面，英國田徑名將法拉都有落場，仲為費迪南隊入波添！費迪南隊由冼佳亞梅開二度，場波最後踢成2:2，要互射12碼入勝負，摩連奴雖然射入第3輪12碼，不過守龍嘅佢就1球都救唔到，費迪南隊贏5:3，而摩佬更加延續佢喺英格蘭球隊互射12碼未贏過嘅走勢。