李居明同蓋鳴暉（Joyce）今日到港台接受訪問 ，講到農曆年期間Joyce要演出李居明所寫嘅新劇，及鳴芝聲劇團嘅演出，合共廿幾場。 Joyce表示同李居明嘅合作已經第八年，佢話：「李師傅寫咗30幾套劇，我自己已經演出咗十套佔咗三分一。」又大讚同李居明嘅合作好開心：「大家一路都冇拗撬，否則都唔會合作到咁耐。」

講道西九文化區嘅戲曲中心早前啟用，李居明又有冇計劃將自己嘅劇目進駐戲曲中心？點知佢話西九方面好有問題：「我曾經有諗過將好有爭議嘅《毛澤東》喺戲曲中心上演，佢哋話涉及政治同敏感題材都可以做，但要分紅，呢樣係第一我覺得有問題嘅。」

第二樣李居明得有問題嘅係，西九方面要求全程錄影佢哋嘅演出：「佢哋話用作非商業嘅學術及教育用途，但問題係如果我喺新光租場畀人，都唔會拍人哋個演出啦，其實影張相都唔啱，佢哋話用作學術用途，邊個可以保證到十年八載之後啲片段唔會流出？呢個係關乎知識產權嘅問題。」佢話基於呢兩點問題解決唔到，所以暫時未有計劃會進駐西九。

精選娛聞，喺晒《娛果》
http://fb.com/appledailyent