又見到吳光正。上次見佢係喺葉劉淑儀個匯賢智庫成立記者會上,噚日就係貿易發展局請食飯。吳光正係貿發局主席,專登請傳媒食晏,講吓貿發局未來發展新方向。
吳主席話,貿發局已經40歲,過去做貿易同服務業推廣做得好好,為香港製造咗好多好多就業機會。咁將來目標係開多一瓣──就係搞「高新科技」同創意產業,貿發局的使命係推廣香港作為科技貿易中心,而科技貿易會成為該局日後三頭馬車之一。佢哋成立咗一個「港深高科技聯盟諮詢委員會」,佢自己親自領導。上月又同深圳方面結盟,一齊搞。
吳光正話自己唔係搞科技生意,所以最冇利益衝突;佢雖然唔多識科技,但又對香港行呢條路好有信心,話一定要當一件事嚟做,唔好當係「二奶」,有幾多就做幾多,要好似40年前推廣貿易咁盡力去推;「咪話唔得,唔得都要做,積極去做,唔好等啲人(做科技嗰啲)好似孤兒仔咁(無人理)……」主席咁積極,睇嚟貿發局班人有排忙喇。
華華記得董先生當政時,都好積極搞高科技,所以有數碼港科學園。但自從煲呔上場,好耐冇唱呢支歌仔,大家都唔記得咗,直到葉太個匯賢智庫成立,建議政府「更積極投資參與高新科技研發、將香港發展為內地科研夥伴及知識產權交易平台」,先記番起高科技呢幾個字,點知隔幾日又聽到吳老闆同貿發局嘅新工作方針,果真係「英雄所見略同」?
李華華
讀者如有任何意見或報料,歡迎發送電郵至
[email protected]。