𠵱家兩公婆生細路，好多都係一個起兩個止，唔知係咪呢個原因，搞到呢一代嘅父母零舍緊張，就算發夢都諗住點樣培育自己嘅小朋友，有人追求優質教育，有人就連住屋都話要「上等」，希望仔女可以結識到上等朋友，將來做個上等人。
anitapooh喺《親子王國》提到，「住私人屋苑有設施，但要節衣縮食，不過BB多啲地方玩，群埋啲上等少少嘅小朋友；住平樓就使錢鬆動啲，點揀好？」

群啲上等人

網友Venus_wong30直言，自己當日買私人樓其中一個原因，都係想畀仔女「群啲上等少少嘅小朋友」，所以佢好明白anitapooh嘅感受，亦好贊成佢揀私人屋苑；至於錢銀問題，Venus_wong30話：「謹慎計算供款能力，必要時可以同銀行商量吓減息。」
Teresa認為︰「畀着我，會考慮學校同屋企嘅距離，如果小朋友住喺同學校一區，返學放學時間可以縮短，即係佢有番多啲自己同親子時間，而且又可以留喺學校耐啲參加活動，呢樣嘢畀屋企有個靚會所好得多。」
註冊臨床心理學家朱嘉麗表示，居住環境對小朋友成長係有影響，但唔代表生活喺中上層嘅小朋友，一定會比較乖；生活喺低下階層嘅小朋友，就一定曳過人。父母唔應該咁諗，亦唔好畀小朋友形成呢種階級價值觀。
朱嘉麗又提醒，父母要切實考慮，如果供一層貴價樓，夫婦是否需要同時外出工作？會唔會犧牲咗親子時間？經濟壓力會唔會影響到大人嘅情緒？父母如果唔開心，經濟壓力大，小朋友其實都感受得到，咁樣對小朋友嘅成長，反而會帶嚟負面影響。