話說鬍鬚曾噚日同財經局局長陳家強同金管局總裁陳德霖出發訪京,唔少電子傳媒喺機場等佢,問吓喺佔中關鍵時刻訪京,係咪會傾埋佔中影響?點知鬍鬚曾一開腔就話,查實此行冇乜特別議題,都係恒常安排,淡淡然嘅回應令在場傳媒滴汗。
當問到佔中影響,鬍鬚曾大耍太極唔想答;滬港通係咪受佔中影響?鬍鬚曾話睇唔到有乜直接影響;咁香港好似任總所言,因為佔領運動失去中間人地位呢?佢話最重要都係靠自己努力㗎啫。
咁擔唔擔心佔中會喺APEC後清場呢?佢只回應:「唔會揣測任何事情。」咁見到京官時,會唔會反映佔中意見?鬍鬚曾使出終極hea功:「我唔會講畀你聽嘅!」面對鬍鬚曾hea住答,八方相信在場傳媒都冇乜癮。唔知京官問到佢嘅意見時,鬍鬚曾夠唔夠膽繼續耍太極呢?